Kujtimet e dashurisë kurrë nuk kalojnë. Mbahen, na udhëheqin dhe ndikojnë në neve edhe pasi që burimi i stimulimit shteret. Në këtë gjë s'ka kurrgjë të re. Çdo person i cili e përjetoi dashurinë e vërtetë, e din se kjo lë gjurmë kohë-gjata në zemrën e tij. Kënaqësia e dashurisë zgjatë për arsye se dashuria është e natyrës shpirtërore. Mashkulli, të cilin dashuria nuk mund ta stimulojë në realizimet kulminante, është i pashpresë - ai është i vdekur, edhe pse duket se jeton.
Kthehuni ndonjëherë në të kaluarën dhe freskojeni mendjen me kujtimet e mira në dashurinë e përparme. Kjo do ta zbusë ndikimin e vështirësive dhe telasheve të sotme. Kjo do t'ju japë mundësinë e ikjes prej realitetit të jetës të pakëndshëm dhe, ndoshta - kush e di - mendja juaj do t'ju sjellë, gjatë kësaj tërheqjeje në botën e fantazisë, idetë ose planet të cilat mund ta ndërrojnë tërë pozitën tuaj financiare ose shpirtërore.
Nëse besoni se jeni të palumtur vetëm për shkak se keni dashuruar dhe keni humbur, hidheni këtë mendim. Ai i cili vërtetë dashuron, kurrë nuk humb tërësisht. Dashuria është e çuditshme dhe temperamente. Ajo vjen kur të dojë dhe shkon pa paralajmërim. Pranojeni dhe kënaquni në të deri sa zgjatë, por mos humbni kohë duke u mërzitur për shkak të shkuarjes së saj. Mërzitja kurrë nuk do ta kthejë.
Po ashtu hidheni edhe mendimin se dashuria vjen vetëm një herë. Dashuria mund të vijë e të shkojë, shumë herë, por asnjë përvojë e dashurisë nuk ndikon në neve në mënyrë të njëjtë. Mund të ekzistojë, e zakonisht edhe ekziston, një përvojë e dashurisë, e cila lë gjurmë më të thella në zemër prej të tjerave. Të gjitha përvojat e dashurisë janë të dobishme, pos kur personi bëhet cinik ose i tërbuar kur i shkon dashuria.
Dashuria nuk duhet të sjellë zhgënjime, dhe këto as s'do të mundnin të ekzistonin, nëse njerëzit do ta kuptonin dallimin mes ndjenjave të dashurisë dhe seksit. Dallimi kryesor në këtë është se dashuria është shpirtërore, ndërsa seksi biologjik. Asnjë përvojë, e cila mbërrin ta prekë zemrën e njeriut me forcë shpirtërore, s'mund të jetë e dëmshme, pos prej paditurisë ose xhelozisë.
Dashuria, padyshim, është përvoja më e madhe e jetës. Ajo na bashkon me inteligjencën e pafundme. Kur të lidhet me romantikën dhe seksin, ajo mund të na çojë lartë në shkallët e orvatjes kreative. Emocionet e dashurisë, seksit dhe romantikës, janë brinjë të trekëndëshit të amshueshëm të gjeniut krijues.
Dashuria është emocion me shumë aspekte, nuanca dhe ngjyra. Por më e forta dhe më e ndezura prej të gjitha llojeve të dashurisë është përzierja e emocioneve të dashurisë dhe të seksit. Martesat, të cilat nuk janë të bekuara me ndjenjën e amshueshme të dashurisë së balancuar si duhet dhe të harmonizuar me seksin, nuk mund të jenë të lumtura dhe - rrallë zgjasin. Vet dashuria nuk do të sjell lumturi në martesë, sikur edhe vet seksi. Kur këto dy emocione të mrekullueshme bashkohen, martesa mund ta formatizojë gjendjen e vetëdijes, e cila në aspektin shpirtëror rrallë herë mund të njihet në këtë tokë.
Kur ndjenjat romantike i përmbushin ndjenjat seksuale dhe ato të dashurisë, zhduken pengesat mes mendjes së fundme të njeriut dhe inteligjencës së pafundme.