I vetmi realitet që ekziston për njeriun në ëndrrat e zakonshme është vet ajo botë imagjinare - ëndrra. Për dallim nga kjo, te ëndrrat e quajtura "LUCIDE" përveç realitetit ëndërr, ekziston edhe realiteti tjetër - bota e vërtetë e njeriut, e që kjo bëhet e mundshme kur njeriu është i vetëdijshëm edhe pse ndodhet në gjumë.

Gjatë ëndrrës së zakonshme njeriu nuk është i vetëdijshëm se ndodhet në ëndërr, në një realitet imagjinar që arrihet kur thellësisht relaksohet trupi. Për të ëndrra është i vetmi realitet, që do të thotë se në atë gjendje njeriu nuk është i vetëdijshëm për jetën e vetë në këtë realitet. Pra i vetmi realitet që ekziston për njeriun në ëndrrat e zakonshme është ajo botë imagjinare - ëndrra. Për dallim nga kjo, te ëndrrat e quajtura "LUCIDE" përveç realitetit ëndërr ekziston edhe realiteti tjetër - bota e vërtetë e njeriut, e që kjo bëhet e mundshme kur njeriu është i vetëdijshëm edhe pse ndodhet në gjumë. Pra ai e dinë se ndodhet në gjumë - ëndërr.

Te ëndrrat e zakonshme njeriu nuk është në gjendje të bëjë asgjë përveç që në mënyrë pasive ta përjetoj ngjarjen "sikurse në ndonjë film" që e përjeton ngjarjen me emocione. Mirëpo, paramendoni sikur ju të mund ta kontrollonit atë film dhe të shëtiteni edhe nëpër pjesët tjera të skenës, që në ekran nuk duken! Nëse mund të paramendoni këtë, atëherë do të keni më të qartë se ç'ka janë ëndrrat lucide. Me fjalë tjera ëndrra lucide është "ëndërrimi i vetëdijshëm", dhe pikërisht ajo mundësi që ëndrra të kontrollohet nga personi që e sheh atë. Gjatë ëndrrave lucide, ju mund të merrni pjesë aktivisht në ngjarjet dhe t'i formësoni ato apo t'i krijoni në njëfarë mënyre. Për herë të parë termin "Ëndërr lucide" e përdori psikologu Holandez - Frederik van Eeden, termin ky me të cilin e emërtoi ëndrrat e tija në të cilat kishte një dozë të caktuar të kontrollit.

Në varësi nga individët, me anë të ushtrimeve mund të arrihet me sukses për disa muaj që të përjetoni ëndrra lucide. Ndoshta tashmë edhe keni përjetuar ndonjë herë ëndërr lucide spontanisht!? A keni pasur ndonjë ëndërr në të cilën sadopak keni pas një dozë të vetëdijes? P.sh., keni ëndërruar dhe e keni ditur se jeni në ëndërr, dhe se përveç saj ekziston edhe realiteti jashtë saj.

Në pyetjen, pse të arrihet një ëndërr e tillë, ne nuk mund t'ju përgjigjemi. Pse-në duhet vet ju të dini. Ne këtu më tepër do të merremi me metodën si të arrihet ajo. Natyrisht, ata që ia kanë arritur të kenë një vetëdije të caktuar në ëndërr, pra të përjetojnë ëndërr lucide, shumë më letë mund të arrijnë projeksionin astral apo madje edhe gjendje e quajtur auto-hipnoza. Të gjitha janë këto përjetime pak a shumë të ngjashme por që megjithatë dallohen mes vete dhe kanë të bëjnë me një përvojë të quajtur "përvoja jashtë trupit" dhe të gjitha shpijnë drejt komunikimit më të mirë të vetëdijes me ndërdijen për të arritur njohuri më të mëdha mbi shumëçka në jetë. Për gjitha këto do të shkruajmë së shpejti në faqet e Mjellmës, ndërsa tash le t'i kthehemi ëndrrave lucide.

Shumë ëndrra nuk mbahen në mend. Këtu është dhe problemi edhe me ëndrrat lucide. Ju mund t'i arrini ato spontanisht apo me ushtrime, por si të mbahen mend? Shumë mjeshtër, për këtë dukuri, preferojnë që së pari vëmendjen në ushtrimet tuaja t'i kushtoni ëndrrave të zakonshme dhe më pastaj të filloni me ëndrrat lucide. E për t'i mbajtur mend ato hapi i parë do të duhej të ishte Ditari i ëndrrave.

Hapi i parë - Ditari i ëndrrave

Që të arrini të vendosni një sasi të vetëdijes në ëndrrat tuaja, unë ju propozoj ta mbani një fletore dhe laps nën jastëk. Në fillim, ndoshta disa ëndrra të para do të duhet t'i regjistroni pak më në detaje, mirëpo më vonë kjo nuk do të jetë e nevojshme. Pse ju them nën jastëk? Ngase qëllimi është që menjëherë sa të zgjoheni ta regjistroni ëndrrën tuaj. Me kalimin e kohës ëndrra harrohet, kështu që pas një ore mund të ndodh ta harroni madje edhe gjysmën e ëndrrës, ndërsa brenda ditës, vështirë se do t'ju kujtohet më tepër se 10% e përmbajtjes së ëndrrës. Është shumë me rëndësi të mbahen mend detajet, dhe të shkruhen, p.sh; kush ishte në ëndërr, çka ka ndodhur, çka keni folur, si jeni ndier, ku keni qenë etj. Pra si po e vëreni, duhet t'i përgjigjeni pesë pyetjeve të cilët i përdorin gazetarët: KUSH? KU? PSE? ÇKA? SI? Dhe mos harroni është me rëndësi çdo ditë ta mbani këtë ditar të ëndrrave.

Është shumë mirë që nëse dëshironi të avanconi me këtë teknikë sa më parë, të zgjoheni vetëm pa përdorur orë apo zile. Posa t'ju dalë gjumi, mos lëvizni shumë, mbani sytë mbyllur, relaksohuni dhe mos lejoni t'ju ikë ndjenja që shfaqet në çastin kur kaloni nga ëndrra në ketë realitet, pra thjeshtë relaksohuni që të qëndroni sa më shumë në njëfarë mesi, as në ëndërr as në realitetin tonë. Nuk duhet të mundoheni që të qëndroni me çdo kusht në atë gjendje, ngase çdo tentim i dhunshëm do t'ju zgjojë.
Përpiquni t'ju kujtohet se çka keni ëndërruar, mendoni në ëndrrën që e keni parë. Pas një kohe thjesht mund t'i rekonstruktoni detajet dhe t'ju kujtohen ëndrrat tuaja, detajet, fotografitë etj. Është interesante se eksperimenti me gjendjen as në gjumë as në ëndërr te personat e ndjeshëm (më senzitiv) mund të sjellë gjer te ëndrra lucide, madje edhe te projektimi astral. Po ashtu në gjendjen gjysmë të zgjuar ndodheni edhe kur të shtriheni për të fjetur. Ajo është gjendja pikërisht kur ju hyni në ëndërr, ndërsa ende e keni vetëdijen. Këtë unë më së shumti e adhuroj.

Të paramenduarit - Vizualizimi

Sikurse që për ndriçimin e një poqi elektrik, nevojitet energjia elektrike, ashtu edhe për arritjen e ëndrrës së vetëdijshme nevojitet energji. Ajo energji në fillim është vizualizimi. Vizualizimi është një llojë paramendimi apo imagjinimi i ngjarjes dhe gjërave, por që për dallim nga paramendimi i thjeshtë, këtu marrin pjesë dhe janë shumë aktive edhe ndjenjat dhe emocionet. Para se të fillohet vizualizimi, trupi duhet të relaksohet mirë, pra së pari duhet të mësoni të relaksoni trupin tuaj. Ja një teknikë që unë e preferoj për të arritur vizualizimin e suksesshëm.

-Vendosuni në ndonjë vend të këndshëm, ku do të mund të relaksoni krejt trupin tuaj. Për metodat e relaksimit lexoni në temën: Disa teknika për ta arritur relaksimin fizik dhe psikik. Pasi të jeni relaksuar filloni procesin e vizualizimit. Paramendoni, se posa të shtriheni dhe relaksoheni, automatikisht shtrati i juaj ngritet lartë në ajër për rreth 20 m, dhe aty ju pretë një fluturake. Ngriteni nga shtrati dhe hyni në fluturake. Ajo ju shpien mbi qendër të qytetit dhe aty në lartësi ndalet, hapet dera e fluturakes dhe ju dilni jashtë. Po sa e bëni hapin e parë, qëndroni pezull në ajër. Provoni, mund të lëvizni. E ndjeni ajrin e freskët. Shikoni qytetin që shihet sikur nga perspektiva e zogut. Provoni të ecni apo të fluturoni përreth objekteve, ndërtesave etj. Pra është me rëndësi që sa me besnikërisht t'i përjetoni gjërat gjatë vizualizimit. Mos u mundoni me forcë me e arritur këtë. Nëse ju zë gjumi, në rregull është. Le të jetë e gjithë kjo me një spontanitet dhe lehtësi. Do ta keni vështirë në fillim, por për disa ditë mësoheni. Pra me forcë asgjë nuk do të arrini, përkundrazi do ta humbni koncentrimin. Pas pak serish ngrituni lartë, ecni apo fluturoni dhe kthehuni në fluturake e cila do t'ju sjellë gjer te vendi mbi banesën tuaj, aty ku ju pret shtrati. Dilni nga fluturakja, shtrihuni në shtrat dhe shtrati kthehet në vendin e vet...E gjithë kjo duhet të jetë e përcjell me ndjenjë reale, sikur të ndodhte në realitetin fizik e jo në botën mendore. Është me rëndësi që çdo ditë të paramendohet - vizualizohet skenari i njëjtë pa ndryshime, ngase çdo ndryshim mund ta kthej avancimin tuaj në fillim. Pasi të ktheheni në shtrat, bindeni veten duke i sugjeruar me përsëritje mendjes suaj: "Unë dë të vetëdijësohem në ëndërr dhe do ta kem kontrollin e plotë". Disa herë do t'ju zë gjumi para kohe, tjera herë do të keni pengesa të ndryshme... Duroni dhe bëhuni këmbëngulës. Çdo natë përsëritni t njëjtin vizualizim. Një mesnatë duke qenë në gjumë do të zgjoheni në ëndrrën tuaj dhe do të ndodheni në vendin e vizualizuar deri tash dhe nga aty do të mund të shkoni kudo që dëshironi duke e pasur vetëdijen e plotë. Edhe pse trupi i juaj fizik ndodhet në gjumë, ajo me të cilin ju udhëtoni gjatë ëndrrave lucide quhet trupi astral, prandaj për këtë kjo dhe quhet Projektim Astral apo Përvojë jashtë-trupore (Out of Body Experience). Se çfarë ndjenje është, do të kuptoni vetëm atëherë kur e përjetoni këtë.